Équité என்பது இலங்கையில் LGBTIQ+ சமூகத்தினரின் உரிமைகள் மற்றும் பரந்த மனித உரிமைகளைப் பாதுகாப்பதற்காக அர்ப்பணிப்புடன் செயல்படும் முன்னணி அமைப்பாகும். இவ்வமைப்பு அரசாங்கம் மற்றும் தேசிய பங்காளி அமைப்புகளுடன் இணைந்து செயல்படுகிறது. இதன் மூலம், ஒதுக்கப்பட்ட மற்றும் புறக்கணிக்கப்பட்ட சமூகங்களின் உரிமைகளைப் பாதுகாப்பதற்கான கொள்கை மாற்றங்களையும், அனைவரையும் உள்ளடக்கிய நிர்வாக முறையையும் மேம்படுத்துவதற்கான நடவடிக்கைகளை முன்னெடுக்கிறது.

Équité நிறுவனம், இலங்கையில் உள்ள LGBTIQ+ சமூகத்தினர் எதிர்கொள்ளும் சவால்கள், சட்டரீதியான தடைகள் மற்றும் பாகுபாடுகளைப் புரிந்துகொள்வதற்காக அளவுசார் மற்றும் பண்புசார் ஆராய்ச்சிகளை மேற்கொள்கிறது. இந்த ஆராய்ச்சிகள் மூலம், சமூகத்தினரின் உரிமைகளைப் பாதுகாக்கவும், தேவையான கொள்கை மாற்றங்கள் மற்றும் சீர்திருத்தங்களை முன்னெடுக்கவும் அடித்தளம் அமைக்கப்படுகிறது.எமது ஆராய்ச்சி அறிக்கைகள், எதிர்கால உரிமைசார் வாதாடல் நடவடிக்கைகள் மற்றும் கொள்கைச் சீர்திருத்தங்களை முன்னெடுப்பதற்கான அடித்தளமாக அமைகின்றன.

LGBTIQ+ உரிமைகளுக்காகப் பணியாற்றும் மனித உரிமைப் பாதுகாவலர்களின் அறிவையும் திறன்களையும் மேம்படுத்துவதற்காக, Équité நிறுவனம் தொடர்ந்து பயிற்றுநர்களுக்கான பயிற்சி (ToT) நிகழ்வுகளை நடத்துகிறது. இப்பயிற்சிகள் மூலம், கொள்கை மாற்றத்திற்கான பேச்சுவார்த்தை, பொதுப் பேச்சு மற்றும் சமூக மட்டத்தில் அமைப்புகளை உருவாக்குதல் போன்ற நடைமுறைத் திறன்கள் வளர்க்கப்படுகின்றன. இதன் மூலம், சமூகத்தின் குரல்களை வலுப்படுத்தி, மாற்றத்தை ஏற்படுத்தவும், அனைத்து மட்டங்களிலும் மனித உரிமைகளை மேம்படுத்தவும் பங்கேற்பாளர்கள் ஊக்குவிக்கப்படுகின்றனர்.

LGBTIQ+ தொடர்பான விடயங்களைப் பொறுப்புடனும், அனைவரையும் உள்ளடக்கிய வகையிலும், தாக்கத்தை ஏற்படுத்தும் வகையிலும் ஊடகப் பணியாளர்கள் உருவாக்குவதற்கு Équité நிறுவனம் ஆதரவளிக்கிறது. இப்பயிற்சியில், உணர்வுபூர்வமான மற்றும் சர்ச்சைக்குரிய விடயங்களை ஊடகங்களில் எவ்வாறு எடுத்துரைப்பது என்பது குறித்து விரிவான பயிற்சிகள் வழங்கப்படுகின்றன. நிகழ்ச்சியின் இறுதியில், சிறந்த திட்டங்கள் நிபுணர் குழுவினால் தெரிவுசெய்யப்பட்டு, அவற்றைத் தயாரிப்பதற்கான நிதி உதவி வழங்கப்படுகிறது. சமூகத்தில் நிலவும் தவறான கருத்துக்களையும் களங்கங்களையும் மாற்றி, படைப்பாற்றல் மற்றும் கதைசொல்லல் மூலம் குறைவாகப் பிரதிநிதித்துவப்படுத்தப்படும் சமூகங்களின் குரல்களை வலுப்படுத்துவதே இத்திட்டத்தின் நோக்கமாகும்.

Équité நிறுவனம், LGBTIQ+ சமூகத்தைக் கொண்டாடி, அவர்களை மேம்படுத்தும் வகையில் அனைவரையும் உள்ளடக்கிய பல்வேறு நிகழ்வுகளை நடத்துகிறது. வானவில் சந்தைகள் முதல் பெருமித கொண்டாட்டங்கள் வரை, இந்நிகழ்வுகள் சமூக உறவுகளை வளர்க்கவும், சமூகத்தின் இருப்பை வெளிப்படுத்தவும், மகிழ்ச்சியைப் பகிர்ந்துகொள்ளவும் வாய்ப்பளிக்கின்றன.
இவற்றில் முக்கியமானது, Équité நிறுவனம் ஆண்டுதோறும் நடத்தும் இலங்கை பெருமித (Sri Lankan Pride) கொண்டாட்டமாகும். இது இலங்கை முழுவதும் உள்ள LGBTIQ+ சமூகத்தினர், அவர்களுக்கு ஆதரவளிப்போர் மற்றும் அமைப்புகளின் மனவலிமையையும் பன்முகத்தன்மையையும் கொண்டாடுகிறது.

Équité அமைப்பினால் நடத்தப்படும் இலங்கைப் பெருமிதக் கொண்டாட்டம், LGBTIQ+ சமூகத்தினரின் அடையாளத்தை வெளிப்படுத்துதல், சமத்துவம் மற்றும் மனித உரிமைகளை மேம்படுத்துதல் ஆகியவற்றை நோக்கமாகக் கொண்ட ஒரு இயக்கமாகும். இது LGBTIQ+ சமூகத்தினர், ஆதரவாளர்கள் மற்றும் தேசிய மட்டத்திலான பங்குதாரர்களை ஒன்றிணைத்து, பல்வேறு திறமைகளைக் கொண்டாடுவதுடன், இலங்கையின் கலாசாரப் பாரம்பரியத்தை மீட்டெடுத்து, ஒற்றுமை, படைப்பாற்றல் மற்றும் கூட்டுச் செயற்பாடுகள் மூலம் பாகுபாடுகளுக்கு எதிராகச் செயல்படுகிறது.

Équité நுவரெலியா பாதுகாப்பு இல்லமானது, LGBTIQ+ சமூகத்தினருக்கு, குறிப்பாகப் பாலின மற்றும் பாலியல் அடையாளங்களில் பல்வகைத்தன்மை கொண்ட பெண்களுக்கு (Queer Women), பாதுகாப்பான, அனைவரையும் உள்ளடக்கிய மற்றும் ஆதரவான சூழலை வழங்குகிறது. இங்கு அவர்கள் சமூக ஆதரவைப் பெறவும், புதிய தொடர்புகளை உருவாக்கவும், தங்களது உணர்வுகளையும் அடையாளங்களையும் சுதந்திரமாக வெளிப்படுத்தவும் முடியும்.
இந்தப் பாதுகாப்பு இல்லம், ஒவ்வொருவரினதும் கண்ணியம், நல்வாழ்வு மற்றும் சுயவலிமையை மேம்படுத்துவதுடன், சமூகத்தில் தமக்கென ஓர் இடமும் சேர்ந்திருக்கும் உணர்வும் உருவாக உதவுவதை நோக்கமாகக் கொண்டுள்ளது. மேலும், பாகுபாடு மற்றும் சமூக இழிவுபடுத்தல் அற்ற சமூகத்தை உருவாக்குவதையும் ஊக்குவிக்கிறது.

நிறுவனங்களில் அனைவரையும் உள்ளடக்கிய, பரஸ்பர மரியாதை கொண்ட பணிச்சூழலை உருவாக்குவதற்காக, Équité நிறுவனம் LGBTIQ+ உரிமைகள் தொடர்பான விழிப்புணர்வுப் பயிற்சிகள், ஆதரவாளர்களுக்கான பயிற்சிப் பட்டறைகள் மற்றும் அனைவரையும் உள்ளடக்கிய கொள்கைகளை உருவாக்குவதற்கான வழிகாட்டுதல்களை வழங்குகிறது.